Actualidad

« Atrás

Los profesores García Arias y D’Andrés, nel Cursu de Branu de Jaca / Chaca dedicáu a les llingües iberorromániques

Los díes 14 y 15 de xunetu d’anguaño va celebrase en Jaca / Chaca (Huesca) el Cursu de Branu tituláu «Fonética histórica comparada de les llingües iberorromániques». Ye ún de los Cursos Estraordinarios de Branu qu’entama tolos años la Universidá de Zaragoza.

El Cursu, dirixíu polos profesores Javier Giralt Latorre y Francho Nagore Laín, tien un programa qu’atiende al gallegu y portugués, al asturianu, al castellanu, al vascu, al aragonés, al occitanu aranés y al catalán.

La presencia asturiana apórtenla los profesores Xosé Lluis García Arias y Ramón d’Andrés, de la Universidá d’Uviéu. El profesor García Arias va intervenir col tema «Fonética histórica del asturianu», y amás va zarrar el primer día cola presentación del so Diccionariu Etimolóxicu de la Llingua Asturiana (DELLA), una obra monumental de la llingüística hispánica y románica, publicada ente los años 2017 y 2022 y completada apocayá col tomu séptimu.

Pela so parte, el profesor D’Andrés va ser l’encargáu d’abrir el Cursu cola ponencia inaugural titulada «Tendencies evolutives xenerales de la Iberorromania frente a otres árees romániques».

Los interesaos y interesaes en matriculase nesti Cursu, entrái nesti enllaz de la Universidá de Zaragoza:

https://cursosextraordinarios.unizar.es/curso/2022/fonetica-historica-comparada-de-las-lenguas-iberorromanicas