Actualidad

« Atrás

Llecciones asturianes nel Cursu de Fonética Histórica Comparada de les Llingües Iberorromániques, celebráu en Jaca/Chaca

Los díes 14 y 15 de xunetu celebróse en Jaca / Chaca (Huesca) el Cursu de Fonética Histórica Comparada de les Llingües Iberorromániques, dientro los Cursos Estraordinarios que tolos años entama la Universidá de Zaragoza na Residencia Universitaria de Chaca. (Estos cursos lleven faciéndose de magar 1927 y son los más antiguos d’España; pasaron per ellos celebridaes de la filoloxía, de la lliteratura, de la ciencia y de toles cañes del saber).

Nesti Cursu de Fonética, dirixíu por Francho Nagore y Javier Giralt, foi apreciable la participación asturiana de la Universidá d’Uviéu:

●El profesor Ramón d’Andrés impartió la llección inaugural, de dos hores, titulada «Tendencies evolutives xenerales d’Iberorromania frente a otres árees romániques», una presenciación xeneral de la tipoloxía fonética de les llingües peninsulares dientro’l mundu romance.

●El profesor Xosé Lluis García Arias impartió la llección, tamién de dos hores, titulada «Fonética histórica del asturianu», onde repasó, con abonda y precisa documentación, una riestra de peculiaridaes de fonética evolutiva de la nuestra llingua dientro’l conxuntu peninsular y románicu.

●El mesmu profesor García Arigas punxo’l ramu a la primer xornada del Cursu cola presentación del monumental «Diccionariu Etimolóxicu de la Llingua Asturiana» (DELLA), de 7 volúmenes, dando detalle del procesu históricu d’ellaboración de la obra, de les fontes y de la metodoloxía de trabayu. Punxo tamién dellos exemplos ilustrativos d’etimoloxíes conteníes na obra.

El restu de participantes, con dos hores d’intervención caún, fueron reconocíes autoridaes na materia: Daniel Recasens i Vives (Universitat Autònoma de Barcelona, fonética evolutiva del catalán); Fernando Sánchez-Miret (Universidad de Salamanca, fonética evolutiva del castellanu y problemes del cambiu llingüísticu); Jesús Vázquez Obrador (Universidat de Zaragoza, fonética evolutiva del aragonés); Jordi Suïls Subirà (Universitat de Lleida, fonética evolutiva del aranés y del occitanu); Juan Carlos López-Mugartza Iriarte (Universidad Pública de Navarra, fonética evolutiva de los llatinismos nel vascu); y Ramón Mariño Paz (Universidade de Santiago de Compostela, fonética evolutiva del gallegu).

Al actu inaugural asistieron autoridaes universitaries y el director xeneral de Política Llingüística del Gobiernu d'Aragón.

 

[Na semeya apaecen los profesores y estudiantes que taben presentes nel actu d’inauguración, nun edificiu al llau de la Residencia Universitaria de Chaca].