Actualidad

« Atrás

L’atles ETLEN y les sos implicaciones teóriques, nel congresu sobre fronteres llingüístiques celebráu na Universidá de Barcelona

Los díes 8, 9 y 10 de xunu del 2022 celebróse na Universidá de Barcelona’l congresu tituláu «Espais de frontera a la península Ibèrica», que quixo ser ―y llogrólo enforma― un alcuentru d’especialistes en dialectoloxía hispánica, que falaron y aldericaron alredor de temes de fronteres llingüístiques.

El congresu, entamáu polos profesores José Enrique Gargallo Gil, Maria Pilar Perea y Xosé Afonso Álvarez, axuntó a 28 investigadores de les variaes zones llingüístiques de la península Ibérica, ente elles Asturies. Porque, n’efectu, hebo vagar pa falar de la frontera ente’l gallegoportugués y l’asturlleonés na parte cabera occidental d’Asturies: na so comunicación (en llingua asturiana) de Ramón d’Andrés, de la Universidá d’Uviéu, fixo un repasu de los problemes conceptuales, metodolóxicos y de teoría dialectolóxica que surdieron na fechura del atles ETLEN («Estudiu de la Transición Llingüística na zona Eo-Navia, Asturies»), publicáu nel 2017. Pela so parte, el profesor Alberto Gómez Bautista faló sobre otra frontera del asturlleonés: la del mirandés col portugués y el castellanu, dando un completu repasu de la so situación llingüística y sociollingüística.

Otres zones llingüístiques estudiaes nesti congresu foron Galicia, Miranda del Douro, el valle de Xálima, Barrancos, Estremadura, Andalucía (frontera de Huelva), Ribagorza y Benasque (frontera ente l’aragonés y el catalán), la llende ente'l catalán y l'ccitanu, del catalán col castellanu, Madrid (fronteres interxeneracionales), Valencia y Estaos Uníos. Como se ve, les fronteres llingüístiques ente España y Portugal tuvieron bona presencia, en relación col proyectu «Frontera hispano-portuguesa: documentación lingüística y bibliográfica» (FRONTESPO), que dirixe Xosé Afonso Álvarez.

El congresu tevo dividíu en delles secciones: «Fronteres diacróniques», «Trabayu coles comunidaes», «Frontera hispanoportuguesa: una visión de conxuntu», «Frontera hispanoportuguesa: frontera meridional», «Frontera hispanoportuguesa: frontera septentrional»«Toponimia de frontera», «Fronteres pirenaiques», «Faces de frontera», «Midimientu y percepción de les fronteres», «Fronteres ideolóxiques» y «Cultura de frontera».

[Na semeya de grupu fecha en patiu de la Universidá de Barcelona, vense les siguientes persones: na fila de delantre, y d’esquierda a drecha, Maria Pilar Perea, Juan M. Carrasco, José Antonio González Salgado, María Victoria Navas, Bernat Corredó, Pilar García Mouton, Isabel Molina Martos, Jairo J. García, Rosario Álvarez, Antonio Torres, Vicent Beltran y Inés Fernández-Ordóñez (cortada); na fila de detrás, Eloi Bellés, Miroslav Valeš, José Enrique Gargallo, Ramón d’Andrés, Alberto Gómez Bautista, Joan Fontana y Carles Segura].