Actualidad

« Atrás

Severino Antuña doctórase cola so tesis n’asturianu sobre la toponimia de La Güeria

El pasáu xueves 21 de xunetu celebróse na Facultá de Filosofía y Lletres de la Universidá d’Uviéu la llectura y defensa de la tesis doctoral presentada por Severino Antuña González, titulada «Documentación histórica de la toponimia de La Güeria Carrocera (Asturies)». La tesis, redactada en llingua asturiana y dirixida por Ramón d’Andrés Díaz, llogró la calificación de Sobresaliente Cum Laude.

El tribunal tevo formáu polos siguientes doctores: José Ramón Morala Rodríguez, de la Universidá de Lleón; Taresa Fernández Lorences, de la Universidá d’Uviéu; Xulio Viejo Fernández, de la Universidá d’Uviéu; Maria Pilar Perea Sabater, de la Universidá de Barcelona; y Sara Gómez Seibane, de la Universidá de La Rioja.

La tesis tien dos partes bien estremaes. La primera ye un compendiu sobre La Güeria Carrocera nos aspectos xeográficu, históricu, natural, cultural, humanu y llingüísticu. La segunda parte, que ye la más estensa y nucleu de la investigación, constitúi un catálogu percompletu de tola toponimia de La Güeria, conseñando toles variantes falaes y escrites de les que se tien documentación dende’l sieglu XVI, y indicando les fontes documentales y el contestu nel qu’apaecen.

Severino Antuña, llicenciáu en Filoloxía Española, ye maestru y profesor d’enseñanza secundaria. Tien una llarga trayectoriu como estudiosu asturianista centráu sobre manera na lliteratura infantil y xuvenil, materies nes que tien fecho importantes aportaciones en revistes especializaes d’Asturies y d’España. Tamién tien estudios sobre la llingua y cultura del so conceyu de nacencia, Samartín del Rei Aurelio, y sobre manera de La Güeria Carrocera.

Con esta investigación, Severino Antuña vien a zarrar una carrera profesional empobinada por un gran enfotu vocacional, pero tamién fai un homenaxe a la tierra que lu vio nacer y espoxigar, nuna obra que, amás del so conteníu científicu, tien muncho de crónica sentimental d’una época y un mundu que s’esmuz pasu ente pasu.

Un momentu del actu de llectura y defensa de la tesis doctoral de Severino Antuña.

Semeya de grupu yá termináu l’actu. D’esquierda a drecha: Ramón d’Andrés Díaz, director de la tesis; Maria Pilar Perea Sabater, vocal del tribunal; Xulio Viejo Fernández, vocal; Severino Antuña Fernández, doctorandu; José Ramón Morala Rodríguez, presidente; Taresa Fernández Lorences, secretaria; y Sara Gómez Seibane, vocal.