Actualidad

« Atrás

El pesu de la lliteratura asturiana nel sieglu XIX

Xuan Carlos Busto Cortina: «Visiones desde el centro hacia la periferia en el XIX: el caso de la literatura asturiana». En Iberian Studies: Reflections Across Borders and Disciplines. Berlin, Peter Lang (Colección: Estudios hispánicos en el contexto global. Hispanic Studies in the Global Context. Hispanistik im globalen Kontex), 2019, pp. 141 - 160. ISBN 978-3-631-79542-2

A pesar de les non munches producciones impreses, a lo llargo del sieglu XIX la lliteratura asturiana goció de cierta proyección y reconocencia fuera d’Asturies.

La publicación de l’antoloxía de poesía asturiana de Caveda y Nava en 1839 xugó un papel decisivu na ampliación del so algame. Dende 1858 la prensa de Madrid foi faciéndose ecu d’eventos celebraos tanto n'Asturies (visites reales, inauguraciones, etc.) como na capital, onde se lleíen poemes n’asturianu. En Madrid fundáronse asociaciones d’asturianos que contribuyeron a la promoción de la poesía asturiana al traviés de celebraciones que se reseñaron na prensa.

Amás, l’interés pola lliteratura asturiana forma parte del más xeneral que se produz en defensa de les lliteratures rexonales a partir de 1860. Munchos intelectuales (Milà i Fontanals, Menéndez Pelayo, etc.) amosáronse interesaos pola lliteratura asturiana, entá reconociendo’l so menor cultivu ente’l restu de lliteratures rexonales. El discursu d’ingresu na Real Academia (1883) de Víctor Balaguer, dedicáu a estes lliteratures, onde se concedía a l’asturiana un llugar destacáu, va marcar un máximu na so reconocencia.

Na última década, la escasa producción editorial (de la que, sicasí, va dar cuenta la prensa madrilana) y el so medianu valor lliterariu, y l’ausencia d’un movimientu políticu y cultural en defensa de la llingua vernácula, que sí se da n’otros llugares, va ser tamién causa d’un menor desenvolvimientu lliterariu na siguiente centuria.

Siguiente