News

« Back

Xeollingüística asturiana nel CSIC en Madrid

El pasáu 28 de setiembre celebróse en Madrid el coloquiu académicu tituláu «Xeollingüística peninsular: investigaciones en cursu». Organizáronlu les profesores Pilar García Mouton, Isabel Molina Martos y l’asturiana Rosabel San Segundo Cachero, del Centru Superior d’Investigaciones Científiques (CSIC), al traviés del so Centru de Ciencies Humanes y Sociales (CCHS).

Esti alcuentru científicu dio un repasu detalláu del estáu de les investigaciones actuales en xeografía llingüística peninsular: trabayos de dixitalización del Atlas Lingüístico de la Península Ibérica (ALPI), investigaciones remanecíes de los datos del ALPI, xeollingüística de les fales ente España y Portugal, y proyectos diversos sobre xeografía llingüística y dialectoloxía d’Andalucía, Madrid, Asturies, País Vascu, Galicia, Cataluña-Valencia-Baleares y Portugal.

De les ponencies encargáronse reconocíos especialistes como Inés Fernández-Ordóñez, Maria-Pilar Perea, Xulio Sousa, João Saramago, Xosé Afonso Álvarez, Gonzalo Águila, Gotzon Aurrekoetxea, Manuel González, Fernando Brissos y les yá mentaes Pilar García Mouton y Isabel Molina Martos. La frontera ente los dominios gallegoportugués y asturlleonés n’Asturies foi oxetu d’una de les ponencies, a cargu de Ramón d’Andrés, de la Universidá d’Uviéu.

La conferencia final tuvo a cargu del prestixosu romanista y dialectólogu catalán Joan Veny i Clar, del Institutu d’Estudios Catalanes y coautor del Atles lingüístic del domini català (ALDC).