News

« Back

Web «Dictadoloxía Tópica d'Asturies» (DTA): xentilicios, nomatos, refranes, dichos y coples

Nel añu 2014 inauguróse la web «DGPE-Asturies»

<https://www.unioviedo.es/dgpeasturies/>

que ye una base de datos onde se rexistren «dictaos tópicos» d'Asturies, esto ye:

●Xentilicios de los distintos llugares d'Asturies.

●Nomatos de los distintos llugares d'Asturies.

●Refranes, dichos o coples referíos a los distintos llugares d'Asturies.

Na web puen facese busques por términu o por llugar de referencia o de recoyida (provincia, conceyu, parroquia o llugar).

El proyectu tenía como oxetu clasificar y poner nes manes del públicu les fiches inédites, referíes a Asturies, que l'escritor Camilo José Cela atropó pal so proyectu de Diccionario geográfico popular de España (DGPE) nos años 70 del sieglu XX. En xunetu del 2012 la Fundación Camilo José Cela y la Universidá d’Uviéu, al traviés del grupu d’investigación «Seminariu de Filoloxía Asturiana», firmaron un conveniu pa la dixitalización, catalogación y publicación online de los materiales inéditos del DGPE referíos a Asturies. Los trabayos, dirixíos por Luis Casteleiro Oliveros y Ramón d’Andrés Díaz, culminaron nel 2014 cola apertura d’esti portal d’accesu y consulta llibre.

Nel 2017, al proyectu «DGPE-Asturies» dáse-y una nueva orientación, que consiste n'enanchar la base de datos non solo colos materiales de Camilo José Cela, sinón con toa mena de «dictaos tópicos» que s'atopen en toa mena d'obres académiques o lliteraries asturianes.

D'esta manera, la web «DGPE-Asturies» ye tamién l'accesu a la web «Dictadoloxía Tópica d’Asturies (DTA)». Nesti momentu, son 43 les obres yá rexistraes y que sirven de fontes pa la base de datos (ver apartáu «Fontes» na web). Esti númberu va aumentar col tiempu, dao que trabayamos de contino col rexistru de nuevos datos sacaos de más fontes.