News

« Back

Cómo se busquen xentilicios, nomatos, refranes, dichos y coples na web «Dictadoloxía Tópica d'asturies» (DTA)

●Dir a la web

https://www.unioviedo.es/dgpeasturies/dta/

●Calcar en «Buscador»

●BUSCA POR «FORMA».

Escribir un xentiliciu, nomatu, refrán, dichu o copla. Por exemplu, «coritos». Si nun la busca nun escueye nengún Llugar de Referencia, nengún Llugar de Recoyida nin nengún Tipu de «dictáu tópicu» (xentiliciu, nomatu, refrán, dichu o copla), el resultáu ye una tabla qu’informa de lo siguiente:

‒NÚMBERU D’ENTRADA de la base de datos.

‒FORMA (nel exemplu, «coritos»).

‒FONTE, onde apaez l’abreviatura d’una obra onde ta rexistráu’l tipu de dictáu tópicu (xentiliciu, nomatu, etc.). Pa interpretar l’abreviatura, nun hai más que calcar en «Fontes», na barra d’arriba, y atopala.

‒LLUGAR DE REFERENCIA, qu’informa de la provincia (Asturies, Lleón, Lugo), el conceyu, la parroquia y el llugar al que se refier el «dictáu tópicu».

‒LLUGAR DE RECOYIDA, qu’informa de la provincia (Asturies, Lleón, Lugo), el conceyu, la parroquia y el llugar onde se recoyó’l «dictáu tópicu».

Si na busca por «Forma» se precisa’l Llugar de Referencia, el Llugar de Recoyida y el Tipu, el resultáu ye, lóxicamente, más afináu.

●BUSCA POR «LLUGAR DE REFERENCIA».

La busca pue consistir en saber qué «dictaos tópicos» hai d’una provincia (Asturies, Lleón, Lugo), un conceyu, una parroquia o un llugar.

Pa ello, escuéyese un determináu topónimu. Por exemplu: provincia d’Asturies, conceyu de Carreño, parroquia de Perlora, llugar de Coyanca. El resultáu ye’l nomatu ayenu «palancos», recoyíu nel DGPE = Diccionario Geográfico Popular de España, de Camilo José Cela. Na tabla de resultaos infórmase de qu’esti nomatu dán-yoslu a los de Coyanca los vecinos de la cercana parroquia de Priendes.

●BUSCA POR «LLUGAR DE RECOYIDA».

El métodu de busca ye igual que col Llugar de Referencia.

●BUSCA POR «TIPU».

La busca pue consistir en saber qué tipos de «dictaos tópicos» se rexistren n’Asturies.

Por exemplu, si s’escueye «Nomatos personales» ensin otru parámetru de busca, el resultáu ye una tabla de 5 pantalles enteres de «dictaos tópicos» con referencia xeográfica.

La busca pue afinase si, al empar que «Tipu», se precisa’l Llugar de Referencia o’l Llugar de Recoyida.