La esposición «Voces. La llingua n’Asturies al traviés de los sieglos» inaugúrase’l martes día 14 na facultá de Filosofía y Lletres de la Universidá d’Uviéu, nel campus del Milán (Uviéu), con asistencia d’autoridaes universitaries y de la Conseyería d’Educación y Cultura, organismu que promueve esti eventu.
La esposición, instalada nel pisu primeru de la facultá, nel pasillu del Departamentu de Filoloxía Románica, ta abierta los meses de mayu y xunu con entrada llibre a cualesquier visitante.
La esposición «Voces» ofrez un completu panorama de la historia llingüística n’Asturies, dende los primeros nicios prehistóricos, pasando per fitos como la llatinización, el surdimientu del asturianu, la castellanización o’l modernu surdimientu. El coordinador científicu ye’l profesor Xulio Viejo Fernández, y son responsables de los conteníos espositivos los profesores Ramón d’Andrés y Roberto González-Quevedo. El diseñu y la maquetación foron frutu del trabayu de Juan Hernaz.
Acompañando la esposición, ponse a disposición de los visitantes un completu catálogu de más de cincuenta páxines.
El visitante atopa ocho secciones desenvueltes en venticinco fitos de trés paneles caún, con testu y ilustraciones abondes sobre los distintos momentos históricos. Hai, amás, vitrines con diversu material d’interés.
Esquema de la esposición:
LA LLINGUA DE LA HUMANIDÁ
El llinguaxe, patrimoniu cognitivu de la especie humana
Un llinguaxe, munches llingües
La llegada del llinguaxe a Asturies
LA LLINGUA D’UN IMPERIU
La romanización
La particularización del llatín n’Asturies
De Conventum Asturum a Asturorum Regnum
EL REMANECER D’UNA FALA
La llingua en documentos arcaicos
El bable viquingu
El surdimientu d’una conciencia diferencial romance
Llingua escondida
¿La llingua del demoniu?
Primeros testos romances
Fueru d’Avilés
La llei n’asturianu
Nicios lliterarios
Un trobador de Tinéu
Xente d’Uviéu
LLINGÜES DE FAMILIA
La escritura medieval n’Asturies antes de la castellanización
A vueltes coles lletres
La entrada del castellanu n’Asturies
La definición d’una identidá llingüística asturiana
Los nomes de la llingua
Vable ye con V
¿Llingua heroica o dialectu vulgar?
La convivencia de llingües na Asturies del Sieglu d’Oru
L’asturianu nos tiempos de Cervantes
El sayagués
L’asturianu de Madrid
LLINGUA DE CULTURA
Les primeres muestres lliteraries
La reflexón intelectual sobre l’asturianu
Los primeros estudios científicos y filolóxicos
Tentatives normativizadores
LLINGUA DE GÜELOS, LLINGUA DE NIETOS
El pasu de la sociedá tradicional a la industrial (primer metá del XX)
La minorización del asturianu (segunda metá del XX)
DE LA DECADENCIA AL SURDIMIENTU
Llingua asturiana y cultura contemporánea
EPÍLOGU
Una empresa humanista