Actualidad

« Atrás

L’asturianu, nel cursu «Llingües minoritaries n’Europa y estandarización» de la Universidá de Zaragoza

Ente los Cursos Estraordinarios de la Universidá de Zaragoza d’anguaño, ta programáu’l que se dedica a les «Llingües Minoritaries n’Europa y estandarización», lleváu a cabu na Residencia Universitaria de Chaca (Aragón) a lo llargo de los díes 19, 20 y 21 de xunetu. Dirixíu por Javier Giralt Latorre, profesor titular de la Universidá de Zaragoza, y por Francho Nagore Laín, profesor titular de la mesma Universidá.

Na primer xornada, la conferencia inaugural correspuénde-y a Ramón d’Andrés (Universidá d’Uviéu, Seminariu de Filoloxía Asturiana), col tema xeneral de presentación «Llingües minoritaries y estandarización». Sígue-y la ponencia de Jordi Suïls Subirà (Universidá de Lleida), sobre la estandarización del occitanu.

La segunda xornada dedícase, con ponencies diverses, a la estandarización del gallegu (Francisco Fernández Rei, Universidá de Santiago de Compostela), del vascu (Pello Salaburu Etxeberria, Universidá del País Vascu), del asturianu (Ramón d’Andrés, Universidá d’Uviéu) y del catalán (F. Xavier Lamuela García, Universidá de Girona).

La tercer xornada céntrase dafechu na estandarización del aragonés y la política llingüística n’Aragón, con estos ponentes: Francho Nagore Laín (Universidá de Zaragoza), Javier Giralt Latorre (Universidá de Zaragoza) y José Ignacio López Susín (director xeneral de Política Llingüística del Gobiernu d’Aragón).

El cursu tien estos oxetivos:

(a) La normativización de les llingües minoritaries y minorizaes, privaes de drechos o funciones davezu reconocíos nes llingües mayoritaries y normalizaes;

(b) La mención especial a les llingües d’Aragón: l’aragonés al norte y el catalán al leste;

(c) L’esame d’otres normativizaciones de llingües minoritaries y minorizaes cercanes: el gallegu, l’asturianu, el vascu, l’occitanu y el catalán;

y (d) L’esame de dellos problemes concretos: la grafización o representación gráfica, la estandarización con modelu supradialectal formal y la modernización léxica.

Más información pue atopase en:

http://cursosextraordinarios.unizar.es/curso/2017/lenguas-minoritarias-en-europa-y-estandarizacion

Siguiente