Actualidad

« Atrás

Celebróse l'homenaxe al profesor José Antonio Martínez

El vienres 29 de mayu del 2015 celebróse nel Paraninfu de la Universidá d'Uviéu l'homenaxe que los sos colegues-y dedicaron al profesor José Antonio Martínez, catedráticu de Llingua Española, con motivu de la so próxima xubilación.
 
[Nel Facebook del Seminariu de Filoloxía Asturiana atópense semeyes d'esti actu.]
 
 
L'actu, presidíu pol rector de la Universidá, Vicente Gotor, abriólu'l profesor Félix Fernández de Castro, que fixo recordanza de la so dómina d'alumnu del homenaxáu y la influencia de les sos enseñances. De secute, entregó-y al profesor Martínez el primer exemplar del volume «Studium grammaticae. Homenaje al profesor José A. Martínez», onde afonden en diversos temes gramaticales filólogos y llingüistes d'un bon númberu d'universidaes españoles y estranxeres.
 
Darréu, el profesor Ramón d'Andrés, coordinador del Seminariu de Filoloxía Asturiana, faló del papel decisivu que xugó José Antonio Martínez pal normal allugamientu académicu de la Filoloxía Asturiana na Universidá d'Uviéu, dende los variaos cargos de xestión qu'exerció na so trayectoria profesional. Entregó-y al homenaxáu'l primer exemplar del númberu especial de la «Revista de Filoloxía Asturiana», tituláu «Varia asturlleonesa n'homenaxe a José A. Martínez».
 
Siguió-y nel turnu de la palabra Pilar García Mouton, llingüista del Conseyu Superior d'Investigaciones Científiques (CSIC) de Madrid, que sorrayó l'amistá y compañerismu de José A. Antonio Martínez, como universitariu y como investigador, y acabó la intervención lleéndo-y un poema d'Ángel González.
 
Pela so parte, Guillermo Rojo, catedráticu de Llingua Española na Universidá de Santiago de Compostela, fixo un repasu al desendolcu de la llingüística funcional n'España de magar los años 80, al empar que recordó les tresformaciones institucionales de la universidá española qu'a la so xeneración, la de José Antonio Martínez y él mesmu, -yos tocó encabezar.
 
El director xeneral de Patrimoniu del Principáu d'Asturies, l'historiador Adolfo Asensio, emponderó'l llabor de Martínez nos años difíciles de la modernización de la Universidá d'Uviéu.
 
Punxo'l ramu al actu'l rector de la Universidá, que-y agradeció a José Antonio Martínez los llargos años de serviciu y prestixu a la institución.