Actualidad

« Atrás

Celebróse en Navelgas l’ homenaxe a Manuel Menéndez

El vienres 27 de febreru del 2015 celebróse na Casa la Cultura de Navelgas (Tinéu) l'homenaxe al llingüista Manuel Menéndez (1909-1962), autor de la monografía "El Cuarto de los Valles. Un habla del occidente asturiano".
 
Abrieron l'actu l'alcalde de Tinéu, José Ramón Feito Lorences; Isidro Sánchez, en representación de la Fundación Valdés-Salas; y Juan Ignacio Ruiz de la Peña, en representación del Real Instituto de Estudios Asturianos.
 
Depués tomaron la palabra los profesores de la Universidá d'Uviéu y miembros del Seminariu de Filoloxía Asturiana, Taresa Fernández Lorences y Ramón d'Andrés, como editores del volume "El Cuarto de los Valles. III. Toponimia, refranes y conjuros", de materiales inéditos de Manuel Menéndez.
 
Siguiéron-yos Fernando Álvarez-Balbuena y Andrés Menéndez, de l'asociación «El Teixu», que presentaron un percompletu y actualizáu mapa toponímicu del conceyu de Tinéu.
 
Darréu, los escritores tineanos Xuan Bello, Antón García y Miguel Rojo recitaron poemes y rellatos n'asturianu occidental.
 
Quedó tamién inaugurada la esposición de semeyes titulada «L'Asturias occidental antias ya güei», que se podrá contemplar nes dos selmanes siguientes na mesma Casa la Cultura.
 
Púnxose ramu al actu con unes palabres d'Arturo Menéndez, fíu del homenaxáu, y el recitáu de dellos poemes ante la placa que n'honor al llingüista ta colocada fuera la Casa la Cultura.
 
La xente de Navelgas y de Tinéu enllenó'l salón d'actos les dos hores que duró l'homenaxe, organizáu pola Universidá d'Uviéu (Seminariu de Filoloxía Asturiana), Real Instituto de Estudios Asturianos, Conceyu de Tinéu, Aula Valdés-Salas y Fundación Valdés-Salas.