Xulio Viejo Fernández, director de la «Revista de Filoloxía Asturiana», ye l'autor del llibru PAREMIAS POPULARES ASTURIANAS (ESTUDIO, CLASIFICACIÓN Y GLOSA), publicáu pol Centro Virtual Cervantes, del Instituto Cervantes, dientro la so «Biblioteca Fraseológica y Paremiológica». Edítase en collaboración col Seminariu de Filoloxía Asturiana y la revista «Paremia». Trátase del meyor catálogu de refranes asturianos iguáu hasta agora.
El llibru pue consultase en llinia o descargase na páxina del Centro Virtual Cervantes:
El llibru, de más de 579 páxines, recueye 3.619 refranes asturianos.
- La INTRODUCCIÓN ye un estensu estudiu bramente documentáu, onde l'autor fai un repasu históricu de la paremioloxía asturiana a lo llargo la historia, al empar qu'esplica les característiques xenerales de los refranes de nuestro y los criterios d'edición remanaos nel llibru.
- El CORPUS DE REFRANES ASTURIANOS ofrez los refranes clasificaos en cinco secciones (temporales, meteorolóxicos, dialogaos, morales y otros). Cada refrán, identificáu con un númberu, tien la so traducción lliteral al castellanu, y va acompañáu d'una esplicación del significáu, xunto cola llista de variantes o espresiones de sentíu equivalente. Ilústrase'l testu con semeyes a color.
- La BIBLIOGRAFÍA ye un completu estáu de la cuestión sobre la paremioloxía asturiana.
- En ANEXO. CORRESPONDENCIAS DE PAREMIAS ASTURIANO-CASTELLANO, los collaboradores Patricia Fernández Martín y Rafael Negrete Portillo ordenen alfabéticamente tolos refranes y ponen al llau la so correspondencia con otru refrán castellanu, siempre que ye posible.