Actualidad

« Atrás

L'actu d'homenaxe al profesor Álvaro Ruiz de la Peña

El vienres 26 de mayu del 2017 celebróse nel paraninfu de la Universidá d’Uviéu l’actu d’homenaxe al profesor de Lliteratura Española y Asturiana, Álvaro Ruiz de la Peña, con motivu de la so xubilación. L’actu taba organizáu pol Institutu Feijoo d’Estudios del Sieglu XVIII y el grupu d’investigación Seminariu de Filoloxía Asturiana.

Na mesa, d’esquierda a drecha: Ramón d’Andrés, coordinador del Seminariu de Filoloxía Asturiana; Ramón Maruri, profesor titular d’Historia Moderna na Universidá de Cantabria y miembru del Institutu Feijoo; Elena de Lorenzo, directora del Institutu Feijoo; Francisco José Borge, vicerrector d’Estensión Universitaria y Proyección Internacional; José Antonio Gómez, decanu de la Facultá de Filosofía y Lletres; Serafina García, directora del Departamentu de Filoloxía Española. A lo fondero, Álvaro Ruiz de la Peña.

Nes diverses intervenciones, glosóse la vida académica del homenaxáu y emponderóse’l so llabor investigador alredor de la lliteratura española de la Ilustración acó, lo mesmo que les sos cualidaes humanes y profesionales. Nel so discursu n’asturianu, el coordinador del SFA destacó les importantes aportaciones d’Álvaro Ruiz de la Peña a la conocencia de la lliteratura asturiana nos últimos trés sieglos.

Álvaro Ruiz de la Peña, mui emocionáu, fixo (en llingües castellana y asturiana) un retratu sentimental del so llabor na Universidá.

Nel actu, Elena de Lorenzo, Ramón d’Andrés y Xulio Viejo entregáron-y al profesor el llibru d’homenaxe, que col títulu de Estudios escogidos axunta una importante selección de trabayos académicos de Ruiz de la Peña.

Ente’l públicu, qu’enllenaba’l paraninfu, taba la familia d’Álvaro Ruiz de la Peña, amás de permunchos amigos y colegues.

El Coru Universitariu peslló l’actu con delles pieces, ente elles el solemne “Gaudeamus igitur”.