Resultados de la búsqueda

  • El Seminariu de Filoloxía Asturiana constituyóse como Grupu d'Investigación de la Universidá d'Uviéu nel añu 2003. Magar qu'adscritu al Departamentu de Filoloxía Española, los sos miembros repártense de fechu ente esti y el Departamentu de Filoloxía Clásica y Románica.

    OXETIVOS Y ALGAME INVESTIGADOR

    El Seminariu de Filoloxía Asturiana constituyóse col oxetivu d'afitar los estudios de Filoloxía Asturiana na Universidá d'Uviéu, forniéndo-yos una mínima estructura institucional y organizativa, non contemplada nel actual diseñu universitariu de departamentos y árees de conocencia. El grupu Seminariu de Filoloxía Asturiana asume como campu d'investigación de so tolo relativo al estudiu de la llingua y la lliteratura asturianes, tanto d'una perspectiva inmanentista como interdisciplinar, xunto con otres persones y colectivos (nel ámbitu del derechu, la historia, estudios etnográficos, antropolóxicos…). D'esti puntu de vista, el grupu vien alitando estremaos proyectos d'investigación de la más variada temática (historia llingüística y lliteraria, dialectoloxía, sociollingüística, llingüística variacional, computacional y de corpus…), col común puntu de xuntura d'una perspectiva innovadora y la busca de la escelencia científica.

    EL SFA Y LA UNIVERSIDÁ D'UVIÉU

    Tien que se resalir que'l Seminariu de Filoloxía Asturiana ye'l primer y únicu grupu d'esti xeitu esistente na Universidá d'Uviéu a lo llargo de la so historia. Ello ye que mesmamente a la de constituyise hai una voluntá consciente d'asumir una tradición más que centenaria d'estudios asturianos na Universidá d'Uviéu y, en daqué manera, de reivindicala y face-y honor.

    Sicasí, esti valiosu patrimoniu intelectual forxáu a lo llargo de la nuestra historia universitaria enxamás se dotara, hasta'l Seminariu de Filoloxía Asturiana constituyise, d'una mínima entidá institucional como tal Filoloxía Asturiana dientro la Universidá d'Uviéu, acullá d'iniciatives puntuales, sobre too en dómines recientes y de les que, en bona midida, foron tamién protagonistes de miembros del grupu: asina, la Biblioteca de Filoloxía Asturiana impulsada y dirixida por Juan Carlos Villaverde Amieva a fines de los años 80 (con cinco volúmenes espublizaos) o, simplemente, la docencia en conteníos de llingua y lliteratura asturianes, impartío cuasimente too ello por miembros del nuestru grupu no que se refier a los planes reglaos y tamién en bona midida (de manera desinteresada y non remunerada) n'otros programes non reglaos.

    Poles mesmes, y frente a otra mena d'actuaciones nel ámbitu de los estudios asturianos, de xuru que bien valioses, el Seminariu de filoloxía Asturiana apostó de bon principiu por una orientación arrecha y esclusivamente universitaria, reclamando pa la Universidá d'Uviéu, como cimera institución académica asturiana, el papel de lideralgu intelectual que de toes toes-y correspuende tamién nesti aspectu tan sensible pa la nuestra sociedá.

    Nesti sen, el Seminariu de Filoloxía Asturiana plantéase non solo trabayar na Universidá, sinón sobre too (y ensin perxuiciu de la collaboración con otres entidaes, públiques o privaes que podemos acreitar) dende la Universidá y, non menos, pa la Universidá d'Uviéu, en cuantes que principal motor de d'espoxigue social d'Asturies, y ensin nenguna servidume que nun seyan los principios xenuinamente universitarios de llibertá intelectual y busca de la escelencia al serviciu del interés públicu xeneral.